Heildarstangveiði 39% minni en í fyrra

Stangveiðin á nýliðnu sumri var í heild um 39% minni en á árinu 2011 og um 16% undir langtímameðaltali. Þetta kemur fram á vef Veiðimálastofnunar.

Á vef stofnunarinnar segir að samanburður veiðitalna og talningar úr fiskteljurum sýni að göngur laxins hafi verið í samræmi við veiðina. Vísitölur seiða í ánum sem gengu til sjávar vorið 2011 voru um eða yfir meðallagi í öllum landshlutum og gáfu fyrirheit um góða laxveiði 2012. Það brást og að því leiti kom þessi mikla minnkun milli ára bæði veiðimönnum og sérfræiðngum á óvart. Skýringa á þeirri miklu lægð sem kom fram í laxveiðinni má að stærstum hluta rekja til lélegs vaxtar í sjó sem aftur bendir til lélegra fæðuskilyrða og aukinna affalla.

Sem fyrr segir var heildarstangveiði um 39% minni en á árinu 2011 og um 16% undir langtímameðaltali. Inni í tölum um laxveiði eru þeir laxar sem upprunnir eru úr sleppingum gönguseiða og einnig þeir laxar sem er sleppt aftur í stangveiði.

"Þegar metið var hver laxveiðin hefði orðið ef engu hefði verið sleppt aftur og að frádreginni veiði úr sleppingum gönguseiða, var veiðitalan sú lægsta síðan öruggar skráningar hófust," segir á vef Veiðimálastofnunar.

Sérfræðingar Veiðimálastofnunar báru saman gögn um veiði og talningar úr fiskteljurum og kom í ljós að göngur laxins voru litlar og í samræmi við veiðina. Skýringa á slakri veiði er því ekki að leita í lélegum veiðiskilyrðum eða lágu veiðihlutfalli.

"Meðalþyngd smálaxa sumarið 2012 var sú lægsta sem sést hefur en marktæk tengsl eru á milli þyngdar laxa og þess fjölda sem skilar sér úr sjó hverju sinni. Nýlegar erlendar rannsóknir hafa sýnt að sterkt samband ríkir á milli vaxtar laxa fyrstu mánuðina í sjó og þeim fjölda laxa sem skila sér til hrygningar hverju sinni. Vöxtur (að fyrsta vetri í sjó) smálaxa úr Norðurá og Hofsá í Vopnafirði og skiluðu sér í þessar ár 2012 (útganga 2011) reyndist mjög slakur miðað við tímabilið 1988-2012," segja sérfræðingar Veiðimálastofnunar meðal annars.

Á vef Veiðimálastofnunar segir að fyrri rannsóknir hafa sýnt að tengsl eru í sveiflum í laxastofnum á milli hafsvæða. Laxastofnar við Barentshaf höfðu sýnt breytingar í stofnstærð 2-3 árum á undan laxastofnum við Ísland á áttunda og níunda áratugnum. Við nánari skoðun kemur í ljós að þessi tengsl haldast ennþá og hefði því jafnvel verið hægt að sjá fyrir niðursveiflu með samanburði á breytingum á fyrrgreindum hafsvæðum. Eldri rannsóknir sýndu sterk tengsl umhverfisþátta í sjó (hiti, selta og áta) við laxveiði ári síðar einkum norðanlands. Þessi tengsl hafa dofnað hin síðari ár en skilyrði í hafinu við Ísland hafa breyst mikið og sjór hlýnað. Því er erfiðara en áður að sjá fyrir væntanlegar breytingar í laxveiði.

Þá segir að laxastofninn muni líklega standa þetta af sér: "Í kjölfar ágætrar afkomu flestra laxastofna á undanförnum árum er ástand seiða í ánum almennt gott og stofnar líklegir til að standa af sér tímabundna niðursveiflu."