Howard táraðist fyrir sinn fyrsta leik með Lakers

Hinn nýi miðherji LA Lakers, Dwight Howard, lék í nótt sinn fyrsta leik fyrir Lakers en hann hefur verið að jafna sig eftir bakaðgerð og því ekki getað spilað fyrr.

Óhætt er að segja að hann hafi byrjað vel því Howard skilaði 19 stigum, 12 fráköstum og varði fjögur skot í leiknum.

Það breytti því samt ekki að Lakers tapaði gegn Sacramento, 99-92, og Lakers er því búið að tapa öllum sex leikjum sínum á undirbúningstímabilinu.

"Ég táraðist við kynninguna," sagði Howard en áhorfendur stóðu þá upp fyrir honum. "Einn félaga minna sá það en ég reyndi að fela það. Ég vissi ekki hverju átti að búast við og þetta var tilfinningaþrungin stund fyrir mig."

Kobe Bryant skoraði 21 stig í leiknum.