Emil lagði upp mark í jafnteflisleik

Hellas Verona tapaði dýrmætum stigum á heimavelli í kvöld þegar liðið gerði 1-1 jafntefli á móti Cesena í ítölsku b-deildinni. Hellas Verona er áfram í 2. sæti en Cesena var fimmtán sætum neðar í töflunni fyrir leikinn.

Emil Hallfreðsson lék fyrstu 75 mínútur leiksins og lagði upp mark Verona fyrir Argentínumanninn Emanuel Rivas strax á fimmtándu mínútu. Króatinn Damjan Doković jafnaði fyrir Cesena á 53. mínútu.

Hellas Verona var búið að vinna fjóra heimaleiki í röð fyrir leikinn en liðið hefur aðeins tapað einu sinni í fyrstu fimmtán deildarleikjum tímabilsins. Emil var þarna að leggja upp sitt fjórða mark á leiktíðinni.