Gætu sparað hundruð milljarða á að skipta á seðlum fyrir myntir

Bandaríkjamenn gætu sparað sér milljarða dollara eða hundruð milljarða króna með því að skipta út einsdollara seðli sínum fyrir mynt.

Hlutlaus fjármálastofnun í Bandaríkjunum hefur reiknað út að ef einsdollara seðlinum yrði skipt út fyrir mynt myndi það spara hinu opinbera þar í landi 4,4 milljarða dollara á 30 ára tímabili. Þetta er árlegur sparnaður upp á tæplega 150 milljónir dollara eða nær 19 milljarða króna.

Það kostar aðeins rúm fimm sent að framleiða hvern einsdollara seðil og einsdollars mynt er töluvert dýrari í framleiðslu. Hinsvegar er líftími myntarinnar um tífaldur á við seðilinn.

Í umfjöllun Daily Finance um málið segir að hið opinbera hafi ákveðið að halda sig við seðilinn. Þetta er sökum þess að almenningur í Bandaríkjunum vill heldur nota dollaraseðilinn en myntina.

Allt frá árinu 1971 hafa yfirvöld reynt að fá almenning til að nota einsdollars myntir í stað seðla en það hefur lítinn árangur borið. Yfirleitt er um 40% af þeim myntum sem settar eru í umferð skilað aftur ónotuðum í hirslur hins opinbera.