Gerum gott enn betra, öllum til góða

Bjarni Benediktsson er nýr aðstoðarframkvæmdastjóri þjónustusviðs hjá Ingvari Helgasyni og B&L. Hann segir fyrirmyndarþjónustu vera í brennidepli hjá fyrirtækinu sem aldrei fyrr.

„Þjónusta er einn af lykilþáttunum þegar kemur að vali á nýjum bíl, ekki síst til atvinnureksturs. Rekstraröryggi þarf að vera tryggt og þjónustan stöðug og fyrirsjáanleg,“ útskýrir Bjarni á einu fullkomnasta fólksbílaverkstæði landsins, sem búið er öllum þeim tæknibúnaði sem nýjustu bílarnir krefjast.

„Við rekum í raun hátæknisjúkrahús bílaviðgerða. Neyðarþjónusta er starfrækt allan sólarhringinn árið um kring og einnig rekum við litla bílaleigu sem getur gripið inn í ef bílar eru stopp hjá viðskiptavinum,“ upplýsir Bjarni sem þekkir vel til í bílabransanum, því áður var hann framkvæmdastjóri þjónustusviðs Bifreiða & landbúnaðarvéla.

Hann segir bílaflota landsins hafa elst hratt frá árinu 2008 og slíkt kalli á nýjar áherslur og lausnir.

„Í dag kemur til okkar í þjónustu mun hærra hlutfall bíla sem ekki eru lengur í ábyrgð. Þannig höfum við sótt fram í varahlutum sem koma ekki beint frá bílaframleiðendum og náð að lækka varahlutaverð umtalsvert, þótt ávallt sé hugað vel að gæðum. Til að tryggja góða þjónustu koma varahlutir til okkar frá birgjum um allan heim á lágmarkstíma, enda okkar markmið að gera gott enn betra og fylgja þannig eftir metnaði okkar, öllum til góða.“