Gerði myndband við dónalag Bam Margera

„Hann er mjög góður gæi en hefur allt önnur viðmið um hvað teljist eðlilegt," segir Óli Finnsson framleiðandi hjá Illusion og á nýjustu þáttaröð Steindans okkar en hann gerði tónlistarmyndband fyrir Jackass-stjörnuna Bam Margera á dögunum.

„Þetta er við nýtt rapp sem á eftir að vekja athygli. Myndbandið er kannski ekki sérstaklega gróft heldur textinn," segir Óli en lagið fjallar um að hafa samfarir við sjálfan sig.

Upptökur fóru fram víðs vegar um landið og er myndbandið væntanlegt eftir tæpan mánuð. „Það mætti kalla þetta Íslandsmyndband en við fórum á Þingvelli, Sprengisand, að Skógafossi og á marga staði í Reykjavík," segir Óli en hann sá um leikstjórn ásamt Arró Stefánssyni, sem var jafnframt tökumaður. Með þeim í för var Nicole Boyd, kærasta Margera, sem lék í myndbandinu og sýndi að sögn Óla mun meira hold en ærslabelgurinn sjálfur.

Margera íhugar að koma aftur til landsins um Verslunarmannahelgina þrátt fyrir hremmingar sem fylgdu heimsókn hans í júní. „Hann er virkilega heitur fyrir því að koma á Þjóðhátíð og ætlar bókað að koma ef bróðir hans, sem er í hljómsveitinni CKY, nær að redda giggi hér sömu helgi. Hann vill bara ekki þurfa að borga milljónir út af veseni aftur," segir Óli og á við greiðslu sem Margera þurfti að inna af hendi vegna skemmda á bílaleigubíl. „Þetta var að helmingi til hans sök. Hann var fullur eitt kvöldið og sparkaði inn í hurð, einnig var hann að mála í bílnum og það fóru olíulitir í sætin. Síðan var einhver sem keyrði bæði framan og aftan á bílinn meðan hann var kyrrstæður í miðbæ Reykjavíkur."

Jackass-stjarnan lét upptöku myndbandsins ekki nægja heldur lék aukahlutverk í væntanlegri seríu af Steindanum okkar sem kemur á dagskrá Stöðvar 2 með haustinu.- hþt