Bróðir Derrick Rose lætur Bulls heyra það

Það er enn óljóst hvenær stjörnubakvörður Chicago Bulls, Derrick Rose, getur byrjað að spila á nýjan leik. Svo gæti farið að hann missi af öllu tímabilinu.

Bróðir Rose, Reggie, er allt annað en sáttur við stjórnarmenn Bulls og sendi þeim tóninn fyrir að láta ekki til sína taka á leikmannamarkaðnum.

"Hefur liðið gert eitthvað til að styrkja sig? Fengið til sín nýja menn? Það vita allir að leiðin að titlinum liggur í gegnum Miami. Er þetta lið tilbúið í þau átök," spyr Reggie Rose reiður.

"Joakim Noah er frábær leikmaður sem og Luol Deng. Liðið þarf samt meira. Félagið þarf að gera meira til þess að gera þetta lið alvöru samkeppnishæft. Það er sárt að sjá bróðir minn gefa þessu félagi allt en klúbburinn er ekki til í að aðstoða hann við að ná markmiðum sínum."

Tom Thibodeau, þjálfari Bulls, sagði að þessi ummæli væru ekki að raska ró hans.