Ásgeir Trausti sigurvegari kvöldsins

Meðfylgjandi myndir tók ljósmyndarinn Vilhelm Gunnarsson á Íslensku tónlistarverðlaununum í Hörpu í kvöld. Ásgeir Trausti var valinn vinsælasti flytjandinn, platan hans, Dýrð í dauðaþögn var valin hljómplata ársins í popp og rokk flokki og Ásgeir var líka valinn bjartasta vonin í sama flokki. Ekki nóg með það heldur verðlaunaði vefurinn tónlist.is Ásgeir fyrir góðan árangur við að koma sér og tónlist sinni á framfæri á netinu.

Lagið Glow með hljómsveitinni Retro Stefson var valið lag ársins í popp og rokk flokki. Þá var hljómsveitin einnig valin tónlistarflytjandi ársins.

Valdimar Guðmundsson var valinn söngvari ársins.

Söngkona ársins var Andrea Gylfadóttir. Tónverk ársins í djass og blúsflokki var Bjartur eftir Tómas R. Einarsson. Í sama flokki var valin hljómplata ársins The Box tree með Skúla Sverrissyni og Skúla Guðjónssyni. Þorgerður Ingólfsdóttir kórstjóri Hamrahlíðarkórsins fékk heiðursverðlaun fyrir kórstarfið. 

Guðmundur Kristinn Jónsson var valinn upptökustjóri ársins og í flokki sígildrar og samtímatónlistar voru Hulda Björk Garðarsdóttir og Gissur Páll Gissurarson valdir söngvarar ársins. Í sama flokki var Víkingur Heiðar Ólafsson valinn tónlistarflytjandi ársins og besta plata ársins var plata Víkings og Kristins Sigmundssonar sem ber heitið Vetrarferðin. Þá var Orkestur eftir Huga Guðmundsson valið tónverk ársins í sama flokki.

Textahöfundar ársins voru Steingrímur Teague og Andri Ólafsson. Verðlaun fyrir nýsköpun fékk Reykjavík Midsummer Music. Þá fékk hljómsveitin Sólstafir styrk frá Loftbrú Reykjavíkurborgar. Upptökustjóri ársins var valinn Guðmundur Kristinn Jónsson.