Justin myndi spila fótbrotinn

Justin Shouse hefur ekki getað æft af fullum krafti með Stjörnunni síðustu daga eftir að hafa fengið heilahristing á dögunum.

Shouse fékk slæmt höfuðhögg í leik númer tvö í rimmu Stjörnunnar gegn Keflavík í 8-liða úrslitum úrslitakeppni Domino's-deild karla. Shouse fékk heilahristing en lét samt engan vita. Hann spilaði svo í oddaleiknum gegn Keflavík á skírdag og skoraði mikilvæg stig á lokakafla leiksins.

„Justin er ekki nógu góður, því miður. Hann hefur misst úr æfingum og er það í fyrsta sinn sem það gerist síðan ég byrjaði að þjálfa hjá Stjörnunni," sagði Teitur Örlygsson í samtali við Vísi í dag.

„En hann er bara þannig karakter að hann mun spila í kvöld. Hann væri vís til að skora 30 stig í leiknum," bætti hann við en Stjarnan mætir í kvöld Snæfelli í fyrsta leik liðanna í undanúrslitum. Leikurinn fer fram í Stykkishólmi og hefst klukkan 19.15

„Hann hefur verið undir eftirliti lækna og gengist undir öll þau próf sem honum ber. En Justin er bara þannig að hann myndi spila fótbrotinn."

Marvin Valdimarsson hefur einnig verið meiddur en er allur að koma til. Hann spilar með Stjörnunni í kvöld, sem og Jovan Zdravevski sem tók út leikbann í oddaleiknum gegn Keflavík.

„Páskarnir voru nýttir í æfingar og fundi. Mér finnst reyndar eins og að við séum búnir að vera í fríi í þrjár vikur. En það er mikil og góð stemning hjá okkur og við hlökkum til að byrja."

Teitur á von á öðruvísi rimmu en gegn Keflavík. „Snæfell er með breiðari leikmannahóp og er betra sóknarlið. Ég veit ekki um vörnina en það er of snemmt að segja til um það."

„Ég held reyndar að Snæfell sé eina liðið sem við náðum ekki að vinna í deildarkeppninni. Við náðum reyndar að vinna bikarleik í Hólminum," segir Teitur. „Þetta verður mikið fjör. Við erum virkilega spenntir."