Aðeins þremur liðum hefur verið sópað út úr lokaúrslitunum

Haukar taka á móti Fram í dag í þriðja leik liðanna í úrslitaeinvíginu um Íslandsmeistaratitilinn í N1 deild karla í handbolta. Fram getur þarna unnið þriðja leikinn í röð í einvíginu og tryggt sér þar með Íslandsmeistaratitilinn. Leikurinn fer fram á Ásvöllum, hefst klukkan 15.00 og verður í beinni textalýsingu hér á Vísi.

Vinni Fram í dag þá yrði það annað árið í röð sem úrslitaeinvígið vinnst 3-0 og Haukamenn fengju þá jafnframt að kynnast því sem nágrannar þeirra í FH upplifðu í fyrra sem er að vinna ekki leik í úrslitaeinvíginu þrátt fyrir að vera með heimavallarrétt.

Aðeins tveimur öðrum félögum hefur verið sópað út úr lokaúrslitunum en Haukar unnu 3-0 sigur á Val og ÍBV árin 2004 og 2005. Valur og ÍBV voru hinsvegar ekki með heimavallarrétt í þessum einvígum.

Fjórum liðum hefur tekist að minnka muninn í 2-1 eftir að hafa lent 2-0 undir í úrslitaeinvígi úrslitakeppni karla en aðeins einu þeirra (KA 2002) tókst að vinna þrjá leiki í röð og tryggja sér Íslandsmeistaratitilinn. KA lenti þá 2-0 undir á móti Val en vann þrjá síðustu leikina, þar af tvo þeirra á heimavelli Vals. Öll hin þrjú liðin unnu leik þrjú en töpuðu síðan einvíginu í næsta leik á eftir.

Sóp í lokaúrslitum í karlahandboltanum:

2012: FH-HK 0-3  (23-26, 26-29, 26-28)

2005: Haukar-ÍBV 3-0 (31-30, 39-35, 28-24)

2004: Haukar-Valur (33-28, 29-23, 33-31)

Lið sem hafa lent 2-0 undir í lokaúrslitum í karlahandboltanum:

1996: KA* á móti Val - tapaði 1-3

1998: Fram* á móti Val - tapaði 1-3

2002: KA á móti Val - vann 3-2

2004: Valur á móti Haukum - tapaði 0-3

2005: ÍBV á móti Haukum - tapaði 0-3

2011: Akureyri* á móti FH - tapaði 1-3

2012: FH* á móti HK - tapaði 0-3

* Var með heimavallarrétt