Murray missir af Opna franska

Skotinn Andy Murray á við bakmeiðsli að stríða og varð því að draga sig úr keppni á Opna franska meistaramótinu.

Murray fagnaði sigri á Opna bandaríska og Ólympíuleikunum í fyrra en ætlar nú að nýta tímann til að undirbúa sig fyrir tímabilið á grasvöllunum sem hefst að mótinu í París loknu.

„Ég elska að spila í París en það er ljóst að ég er ekki í standi til að keppa. Ég þakka stuðninginn og nú er markmiðið að koma mér aftur af stað eins fljótt og mögulegt er,“ sagði hann.

„Ég hef verið með verk í bakinu í nokkurn tíma. Ég vil vera viss um að vandamálið lagist. Þetta byrjaði árið 2011 en versnaði á leirtímabilinu í fyrra.“

Hann komst í fjórðungsúrslit mótsins í París í fyrra en tapaði þá fyrir David Ferrer.