Sonur borgarstjórans stelur senunni

Nokkur mannfjöldi, og útsendarar fjölmiðla, voru saman komnir við Elliðaárnar klukkan sjö í morgun. Og þeir voru rétt búnir að koma sér fyrir þegar hann var á!

Borgarstjóri Reykjavíkur, Jón Gnarr, hefur komið þeirri hefð á að það er Reykvíkingur ársins sem fær þann heiður að renna fyrir fyrsta laxinn. Og sá er Ólafur Ólafsson. Hann hefur ekki fengist við laxveiði en hefur sett í þá nokkra silungana. Maðkurinn var varla kominn út í þegar laxinn tók. Ólafur lenti í nokkru basli með að landa honum því laxinn tók á rás niður á.

Að sögn S. Björns Blöndal, aðstoðarmanns borgarstjóra, var Ólafur valinn Reykvíkingur ársins í kjölfar tilnefninga sem bárust skrifstofu borgarstjóra. Allnokkur fjöldi tilnefninga barst, en af hverju Ólafur?

"Já, fyrir utan að vera góð og almennileg manneskja þá hefur hann verið formaður íþróttafélagsins Aspar frá árinu 1982. Það hefur hann rekið af mikilli atorku, einkum heiman frá sér úr lítilli skrifstofu."

Íþróttafélagið Ösp var stofnað í maí 1980 af foreldra- og kennarafélagi Öskjuhlíðarskóla, með stuðningi frá Íþróttasambandi Fatlaðra.

Það var hins vegar sonur Jóns Gnarrs borgarstjóra, Jón Gnarr Jónsson, átta ára gamall, sem náði að stela senunni. Hann fékk að reyna sig eftir að Ólafur hafði landað laxi sínum. Og það var sama sagan, laxinn tók um leið og maðkurinn var kominn út í. Að sögn Jóns Gnarrs yngri, við þetta tækifæri, þá er þetta ekki Maríulaxinn, hann hefur veitt um átta laxa um dagana, þó ungur sé að árum.