Keyrir um götur New York á brynvörðum herbíl

JR Smith, leikmaður NY Knicks, er skrautlegur karakter og duglegur að koma sér á síður blaðanna fyrir hina ótrúlegustu hluti.

Hann var mikið í sviðsljósinu í sumar og einhverjir áttu von á því að hann færi sér í kjölfarið hægt og reyndi sem minnst að draga athygli að sér. Það reyndust vera rangar ályktanir.

Smith er búinn að fá sér bíl sem líklega enginn annar almennur borgari keyrir um á. Bíllinn heitir Gurkha F5 og er eingöngu notaður af lögreglu og hernum. Þá í óeirðum og stríði.

Bíllinn er brynvarinn. Það mætti kasta handsprengju í bílinn án þess að hann skemmist. Smith greiddi rúmar 54 milljónir króna fyrir bílinn sem vegur um sex tonn.

Kunnugir segja að það sé algerlega galið að keyra um á þessum bíl. Það eigi enginn borgari að gera. Það gæti verið nákvæmlega ástæðan fyrir því að JR keypti bílinn.