Bojana ráðin yfirþjálfari hjá KR

Bojana Besic hefur verið ráðinn yfirþjálfari kvennaflokka KR í knattspyrnu að því er Norðursport greinir frá.

Bojana hefur verið þjálfari 2. flokks kvenna hjá Þór/KA síðastliðin tvö sumur en hún spilaði með liði félagsins í fjölmörg ár. Bojana hefur verið afar virkur þjálfari norðan heiða og þjálfað bæði í yngri flokkum stráka og stelpna.

Kvennaknattspyrna hefur átt undir högg að sækja hjá KR undanfarin ár. Meistaraflokkslið félagsins leikur í næstefstu deild auk þess sem iðkendur í elstu flokkunum eru fáir. Ráðning Bojönu er liður í að styrkja starfið í Vesturbænum.