Stjörnuframmistaða bikarmeistaranna á Egilsstöðum

Bikarmeistarar Stjörnunnar eru komnir áfram í 16 liða úrslitum Powerade-bikarsins í körfubolta eftir 27 stiga sigur á b-deildarliði Hattar, 86-59, en leikurinn fór fram á Egilsstöðum í kvöld.

Stjarnan vann fyrsta leikhlutann 20-11 og var sextán stigum yfir í hálfleik, 43-27. Stjarnan vann að lokum alla leikhluta leiksins og leikinn með sannfærandi hætti.

Matthew James Hairston lék sinn fyrsta leik með Stjörnunni í kvöld og hann byrjar vel í bláa búningnum. Hairston var með 25 stig, 13 fráköst og 4 varin skot í leiknum.

Marvin Valdimarsson skoraði 24 stig á 22 mínútum, Justin Shouse var með 14 stig og 10 stoðsendingar og Dagur Kár Jónsson skoraði 14 stig.

Frisco Sandidge var stigahæstur hjá Hetti með 24 stig en Austin Magnus Bracey var með 15 stig.