Michigan samdi við leikmann sem lifði af tvö flugslys

Hinn 19 ára gamli körfuboltamaður Austin Hatch á sér sögu sem er engri lík. Hann hefur lifað af tvö flugslys þar sem allir hans nánustu létust.

Árið 2003 var Hatch í flugvél sem hrapaði. Móðir hans, bróðir og systir létust öll í slysinu. Í júní árið 2011 hrapaði aftur vél með Hatch innanborðs. Aftur lifði hann af en í slysinu fórust faðir hans og stjúpmóðir.

Sjálfur slasaðist Hatch mikið í slysinu árið 2011 og var hann í dái í átta vikur. Síðustu tvö ár hefur hann síðan verið að læra að anda, borða, ganga og hreinlega lifa lífinu.

Það er því með ótrúlegum ólíkindum að hann sé í dag að fara að spila körfubolta með einu besta háskólaliði Bandaríkjanna, Michigan Wolverines, á næsta ári.

Það voru aðeins tíu dagar liðnir frá því hann gerði munnlegt samkomulag við Michigan er hann lenti í seinna flugslysinu.

"Að semja vð Michigan hefur verið mitt markmið síðan ég vaknaði úr dáinu. Ég trúði vart eigin augum er ég sá nafn mitt á lista leikmanna liðsins," sagði Hatch en hann er að tjá sig í fyrsta skipti eftir seinna flugslysið.

"Körfubolti er auðvitað bara leikur og á mér stærri markmið í lífinu en að spila körfubolta. Námið gengur fyrir en körfuboltinn hefur alltaf gefið mér mikið."