Fékk fimm ára keppnisbann

Tenniskappinn Guillermo Olaso var í dag dæmdur í fimm ára keppnisbann fyrir að hagræða úrslitum leikja.

Hann var þar að auki sektaður um 2,9 milljónir króna en Olaso, sem er í 236. sæti heimslistans, mun hafa gerst sekur um brot sín árið 2010.

Olaso er 25 ára gamall og ólíklegt að tennisferill hans eigi sér mikla framtíð. Hann fær þó bannið sitt stytt um átján mánuði ef hann greiðir sektina og sækir námskeið um skaðsemi veðmálabrasks.

Yfirvöld í íþróttinni gáfu ekki upp í hverju brot hans fólust með nákvæmum hætti en sögðu að þau hefðu átt sér stað árið 2010.