Unglingarnir fá líka að njóta stóru atriðanna

„Það er svo mikið af unglingum sem eru svakalegir aðdáendur þessara stóru erlendu nafna svo mér fannst þetta góð leið til að sinna þeim hópi líka,“ segir Ólafur Geir Jónsson, skipuleggjandi Keflavík Music Festival.

Í dag fara í sölu sérstakir unglingamiðar á hátíðina sem eru fyrir ungt fólk á aldrinum 14 til 18 ára. Gilda þeir miðar á alla viðburði sem verða í Reykjaneshöllinni en þar koma einmitt öll stóru erlendu atriðin fram. „Dagskráin þar stendur yfir á milli klukkan 19 og 23 öll kvöld. Eftir það fara krakkarnir svo heim og hinir halda niður í bæ þar sem dúndurdagskráin heldur áfram fram eftir nóttu,“ segir Óli Geir en afar takmarkaður fjöldi unglingamiða verður í boði. Nýjasta erlenda atriðið hefur nú verið tilkynnt og verða það strákarnir í hljómsveitinni Rudimental.

Sveitin samanstendur af fjórum ungum Bretum og hefur hún verið starfandi frá árinu 2010. Það var þó ekki fyrr en í fyrra sem þeir náðu alvöru vinsældum þegar lag þeirra, Feel the Love, sló í gegn. Lagið komst meðal annars í efsta sæti yfir bestu lög í Bretlandi og var valið lag ársins 2012 á íslensku útvarpsrásinni Flass. „Það er líka svo geggjað við þá að þetta verður allt í beinni. Það verður ekkert spilað undir á diskum eða neitt svoleiðis heldur verður allt bandið á sviðinu,“ segir Óli Geir. Stór hópur fólks kemur til landsins í tengslum við erlendu atriði hátíðarinnar og má búast við yfir hundrað manns sem koma í beinum tengslum við þau ellefu atriði.