Kynna aðgerðir í lok þessarar viku

Aðgerðir ríkisstjórnarinnar í skuldamálum heimilanna verða kynntar í lok vikunnar. Sérfræðingahópurinn, sem unnið hefur að tillögum um skuldaniðurfærslur, sér um kynninguna ásamt nokkrum fyrirtækjum sem fengin hafa verið til samstarfs við nefndina. Heimildarmenn Fréttablaðsins segja að boðað verði til kynningarfundar á fimmtudag, föstudag eða laugardag, dagsetningin hafi enn ekki verið ákveðin.

Samkvæmt heimildum Fréttablaðsins verður framsetningin á aðgerðum ríkisstjórnarinnar með þeim hætti að almenningur eigi auðvelt með að kynna sér þær.

Sigmundur Davíð Gunnlaugsson forsætisráðherra lýsti því yfir í ræðu sinni á fundi miðstjórnar Framsóknarflokksins síðustu helgi að kynnt verði blönduð leið skuldaleiðréttinga og skattalækkana. Þá hefur forsætisráðherra einnig sagt að fólk muni geta reiknað út með verulegri vissu áhrif aðgerðanna á eigin hag.