Páll Axel jafnar met Guðjóns með næsta þristi

Páll Axel Vilbergsson skoraði sjö þriggja stiga körfur í sigri Skallagríms á Snæfelli í Stykkishólmi í Dominos-deild karla í körfubolta í kvöld.

Páll Axel hefur þar með skorað 964 þriggja stiga körfur í úrvalsdeild og vantar nú aðeins eina þriggja stiga körfu í viðbót til að jafna met Guðjóns Skúlasonar.

Páll Axel hefur raðað niður þriggja stiga körfur í vetur og hefur alls skorað 32 slíkar í þeim tíu leikjum sem hann hefur spilað en það þýðir yfir þrjá þrista að meðaltali í leik.

Það má því búast við að metið falli í Fjósinu í Borgarnesi í næstu viku þegar Skallagrímur tekur á móti Stjörnunni í Dominos-deildinni.

Flestar þriggja stiga körfur í úrvalsdeild karla:

Guðjón Skúlason - 965

Páll Axel Vilbergsson - 964

Teitur Örlygsson - 742

Magnús Þór Gunnarsson - 709

Kristinn Friðriksson - 673