Kreditkortaupplýsingum stolið frá helmingi Suður-Kóreubúa

Tölvufræðingur, sem starfaði sem verktaki hjá suður-kóresku kortafyrirtæki, hefur frá árinu 2012 stolið kreditkortaupplýsingum frá um það bil helmingi íbúa Suður-Kóreu. Upplýsingarnar er hann sagður hafa selt lánafyrirtækjum.

Upp um þetta komst í síðustu viku en í dag báðust yfirmenn þriggja stærstu kreditkortafyrirtækja Suður-Kóreu opinberlega afsökunar á blaðamannafundi.

Verktakinn, sem vann við að þróa hugbúnað sem átti að koma í veg fyrir kreditkortasvindl, er talinn hafa stolið upplýsingum um 80 milljónir kreditkorta. Þetta gerði hann með því að afrita upplýsingarnar á USB-lykil.

Verktakinn starfaði hjá fyrirtæki, sem heitir Korea Credit Bureau, en stal upplýsingunum frá kreditkortafyrirtækinu Lotte Card og tveimur bönkum, KB Financial Group og Nong-Hyup Bank, sem báðir gefa út kreditkort.

Fjármálaeftirlitið í Suður-Kóreu segir að fyrirtækin þrjú muni standa straum af öllu fjártjóni, sem viðskiptavinir þeirra kunna að hafa orðið fyrir af völdum þjófnaðarins.

Að sögn fjármálaeftirlitsins vissu fyrirtækin þrjú ekkert af þessu fyrr en rannsókn var hafin hjá saksóknara ríkisins.

Yfirmenn fyrirtækjanna þriggja hafa nú heitið því að efla til muna öryggi þjónustu sinnar.