Hótaði að skjóta eiginkonuna í hausinn

Leikstjórnandi NBA-liðsins New York Knicks, Raymond Felton, er ekki í góðum málum. Hann var handtekinn í morgun og verður ákærður í nokkrum liðum.

Felton er sakaður um að hafa beint byssu að andliti eiginkonu sinnar og hótað að skjóta hana. Hann var handtekinn aðeins nokkrum klukkutímum eftir að hafa spilað með Knicks gegn Dallas.

Það hefur ýmislegt gengið á hjá Felton í einkalífinu upp á síðkastið en hann stendur í skilnaði við eiginkonu sína til tæplega tveggja ára. Það ferli gengur augljóslega ekkert sérstaklega vel.

Það hefur bitnað á spilamennsku hans en hann er að skora 10,5 stig að meðaltali í leik í vetur sem er það lélegasta sem Felton hefur boðið upp á síðann hann byrjaði í deildinni.