Vélmennið CubeStormer 3 leysti Rubik´s kubb á 3,253 sekúndum og sló þannig met forvera síns CubeStormer 2. Þeir Mike Dobson og David Gilday sýndu vélmennið, sem er að gert úr legókubbum, á tæknisýningu í Birmingham í Englandi nú á dögunum.
Frá þessu er sagt á vefnum Cnet.com.
Samsung Galaxy S4 sími er hluti af vélmenninu og hann greinir stöðu kubbsins og reiknar út þær breytingar sem vélmennið þarf að gera.
Sömu menn settu fyrra metið, sem var 5,27 sekúndur, fyrir tveimur árum
„Við leggjum áherslu á að sýna fram á hvað hægt er að framkvæma með tækni sem er í boði í dag og viljum auka áhuga ungs fólks á vísindum, tækni, verkfræði og stærðfræði,“ sagði Gildsday. „Við vissum að CubeStormer 3 gæti mögulega brotið fyrra met, en þegar vélmennið framkvæmir aðgerðir hraðar en augað getur numið þær, getur alltaf eitthvað komið upp.“
„Stóra áskorun okkar er nú að átta okkur á því hvort hægt sé að gera þetta enn hraðar,“ sagði Gilday.
Vélmenni leysir Rúbik´s kubb á 3,253 sekúndum
