Tuttugasti sigur KR í vetur og deildarmeistaratitilinn á loft - myndir

KR-ingar fengu afhentan deildarmeistaratitilinn í kvöld eftir öruggan 101-78 sigur á botnliði Vals en þetta var níundi sigur Vesturbæjarliðsins í röð og tuttugasti deildarsigur liðsins á leiktíðinni.

Pavel Ermolinskij náði reyndar ekki þrennu í fjórða leiknum í röð, vantaði 2 fráköst og 2 stoðsendingar, en sigur KR-inga var sannfærandi þar sem Martin Hermannsson (20 stig og 11 stoðsendingar) og Demond Watt Jr. (14 stig og 19 fráköst) voru með flottar tvennur.

KR-liðið hefur unnið 20 af 21 leik sínum í Dominos-deildinni í vetur og er með sex stiga forskot á Keflavík sem situr í öðru sæti deildarinnar eftir leiki kvöldsins.

Brynjar Þór Björnsson, fyrirliði KR-liðsins, tók við deildarmeistaratitlinum í leikslok en Stefán Karlsson, ljósmyndari Vísis og Fréttablaðsins, var mættur á verðlaunaafhendinguna og tók myndirnar hér fyrir ofan og neðan.

KRvsValur-Highlights from KRTV on Vimeo.