Touré: Hefðum unnið Barcelona með betri dómara

„Ef við hefðum fengið góða dómara í báðum leikjunum hefði allt verið í þessu fína,“ sagði Yaya Touré, leikmaður Manchester City, eftir tapið gegn Barcelona í 16 liða úrslitum Meistaradeildarinnar í gærkvöldi.

Enska liðið er úr leik eftir 2-0 tap í fyrri leiknum á heimavelli og 2-1 tap í þeim síðari á Nývangi í gærkvöldi.

City missti Martin Demichelis af velli með rautt spjald í fyrri leiknum og Lionel Messi skoraði úr vítaspyrnu í kjölfarið. Þá átti liðið að fá vítaspyrnu í gærkvöldi rétt eins og Börsungar en franskur dómari leiksins átti ekki sinn besta dag.

Samir Nasri tekur undir með samherja sínum en hann sagði City-liðið ekki hafa fengið neina hjálp frá dómurunum.

„Við spiluðum vel og gerðum allt sem við gátum. Við töpuðum þessu einvígi í fyrri leiknum en aftur fengum við enga hjálpa frá dómrunum þannig þetta var frekar erfitt,“ sagði Samir Nasri.