Snæfellskonur áfram kanalausar í kvöld

Snæfell verður ekki með bandarískan leikmann í kvöld í fyrsta leiknum í úrslitaeinvíginu um Íslandsmeistaratitilinn í Dominos-deild kvenna í körfubolta. Snæfell tekur á móti Haukum í Stykkishólmi klukkan 18.00 í kvöld.

Ingi Þór Steinþórsson þjálfari Snæfells, staðfesti í viðtali á karfan.is að liðið yrði án Chynnu Unique Brown í leik eitt og að framhaldið sé óljóst.

Chynna Brown er áfram meidd á fæti en hún meiddist tvisvar í einvíginu á móti Val og var ekki með liðinu í oddaleiknum sem Snæfell vann með dramatískum endaspretti.

„Við stöndum á gati með þetta, hún er meidd í liði í fætinum og reyndi að skjóta aðeins í gær en var sárþjáð og mun því ekki spila með okkur í dag. Hvað verður með framhaldið veit ég jafn mikið og hinn almenni borgari," sagði Ingi Þór við karfan.is.