Of fá hótelrými á HM í Brasilíu

Nú fer verulega að styttast í HM í fótbolta í Brasilíu og ýmsar áhyggjur hafa vaknað vegna skipulagningar mótsins, meðal annars vegna þess að sumir leikvangarnir sem leikið verður á eru ekki tilbúnir.

Þó ættu stærstu áhyggjur gesta sem hyggjast sækja mótið að snúa að hótelrými og þá sérstaklega í borginni Ríó. Búist er við 600.000 erlendum gestum á mótið og að helmingur þeirra muni koma til Ríó. Ekki eru þó nema 55.400 gistirými á hótelum í borginni.

Því hugsa margir húsnæðiseigendur í Ríó sér gott til glóðarinnar og hyggjast leigja íbúðir sínar á uppsprengdu verði. Það sem verra er að margar af þessum íbúðum sem í boði verða eru í fátækrahverfum borgarinnar svo ekki er von á góðu fyrir þá sem bíta á agn eigenda þeirra.

Leiguverð á þessum íbúðum er hátt í 2.000 dollara á meðan mótinu stendur, eða 220.000 kr. Leiguverð  íbúða í betri hverfum Ríó munu hinsvegar kosta um 300 dollara á dag, eða 33.600 kr.

Íbúar fátækrahverfanna eru nú um 1,4 milljón talsins. Þar er glæpatíðni mjög há og því má öryggisgæsla á meðan á mótinu stendur verða mjög góð svo koma megi í veg fyrir að gestum verði ekki hætta búin. Aðrir benda á að umtöluð hætta þar sé orðum aukin þó svo ekki sé ráðlagt að fara á ákveðna staði þar að kveldi.