Hildur Björg í sama skóla og María Ben

Hildur Björg Kjartansdóttir, einn allra besti leikmaður Dominos-deildar kvenna í körfubolta á nýloknu tímabili og lykilleikmaður Íslandsmeistara Snæfells, hefur ákveðið að fara í Texas-Pan American háskólann.

Texas-Pan American háskólinn segir frá því á heimasíðu sinni að Hildur Björg sé búin að samþykkja að spila fyrir kvennakörfuboltaliðs skólans en hún fær fullan skólastyrk hjá UTPA.

University of Texas-Pan American er í Edinburg sem er í suður Texas alveg við landamærin við Mexíkó. Larry Tidwell, þjálfari skólaliðsins, kom til Íslands á dögunum og fylgdist með Hildi Björg spila í úrslitakeppninni.

Hildur Björg er ekki fyrsta íslenska körfuboltakonan til að spila með UTPA því María Ben Erlingsdóttir, núverandi leikmaður Grindavíkur, var í skólanum í fjögur ár.

Hildur Björg var með 15,2 stig, 9,9 fráköst og 1,6 stoðsendingar að meðaltali í leik í deildarkeppninni í vetur en hækkaði allar tölur í úrslitakeppninni upp í 15,5 stig, 10,1 frákast og 3,0 stoðsendingar að meðaltali í leik.

Það er að sjálfsögðu mikill missir fyrir Snæfell að Hildur Björg sé á förum en það var þó vitað í nokkurn tíma að hún hefði mikinn áhuga á að spila í bandaríska háskólaboltanum.