Evrópa ekki tilbúin fyrir fordómaleysi?

Þrátt fyrir frábæra frammistöðu Pollapönk og fallegan boðskap endaði framlag drengjanna í 15 sæti af 26 þjóðum í Eurovision í kvöld. Því má velta því upp hvort Evrópa sé tilbúin fyrir „Enga fordóma“?

Framlag Íslands fékk mest átta stig frá vinaþjóð okkar San Marínó.

En fyrst að hinn stórkostlegi klæðskiptingur Conchita Wurst fór með sigur að hólmi mætti segja að boðskapur Pollapönkara hafi náð í gegn eftir allt saman og að þeir séu jafnvel hinir sönnu sigurvegarar kvöldsins.

Enda sagði Felix Bergsson kynnir kvöldsins um sigur Wurst: „Að ef þetta er ekki að gefa hinum fordómafullu langt nef í eitt skipti fyrir öll þá veit ég ekki hvað."