,,Kallinn er í fáránlegu stuði''

Hraðfréttamaðurinn Benedikt Valsson tilkynnti Evrópubúum fyrir Íslands hönd að atriði Hollands hefði hlotið 12 stig og þar með verið hlutskörpust í áliti dómnefndar og símakosningar íslensku þjóðarinnar í Eurovision að þessu sinni.

Benedikt stóð sig frábærlega. Hann var með mjög góðan framburð og einkar skýrmæltur. Benedikt sló á létta strengi með dönsku kynnunum og bauð Evrópu gott kvöld á íslensku, dönsku, frönsku, spænsku og ensku. Benedikt bætti svo við: "Kallinn er í fáranlegu stuði."

Benedikt tilkynnti einnig að Ísland hefði gefið Austuríki 10 stig og Danmörku 8 stig.

Stigagjöf Íslands skiptist til helminga milli dómnefndar og símakosningar Íslendinga. Dómnefndina skipuðu Friðrik Dór Jónsson, Ragnheiður Gröndal, Kjartan Guðbergsson og Hildur Þórhallsdóttir.