Stórleikur á Vodafone-vellinum

Bikarmeistararnir fengu krefjandi verkefni í 8-liða úrslitum Borgunarbikarsins þegar dregið var í dag. Breiðablik mætir Val á Vodafone-vellinum í stærsta leik 8-liða úrslitanna.

Um er að ræða tvö sigursælustu lið bikarkeppninnar. Valur hefur unnið bikarinn 13 sinnum á meðan Breiðablik hefur unnið bikarinn eftirsótta 9 sinnum.

Aðeins vika er liðin síðan liðin mættust í Pepsi deildinni þar sem Valskonur unnu öruggan sigur á Vodafone-vellinum 3-1.

Fylkir sem sló Þór/KA nokkuð óvænt út fyrir norðan mætir KR í Árbænum. KR gerði sér lítið fyrir og sló út Pepsi-deildar liðið FH í 16-liða úrslitum.

Leikirnir fara fram 27. og 28. júní næstkomandi.

Leikirnir í 8-liða úrslitum:

Þróttur - Stjarnan

Fylkir - KR

Valur - Breiðablik

Selfoss - ÍBV