Fresta olíuhöfn í Norður-Noregi

Lagning neðansjávarleiðslu frá nýfundnum olíulindum í Barentshafi til lands í Norður-Noregi , ásamt byggingu nýrrar olíuhafnar við Honningsvåg, er of dýr. Þetta segir Statoil í tilkynningu í dag þar sem fram kemur að norska olíufélagið hafi ásamt samstarfsfélögum sínum, ENI og Petoro, ákveðið að fresta um eitt ár ákvörðun um hvaða tæknilegu lausnir verði valdar til að vinna olíu af Johan Castberg-svæðinu.

Fyrir Íslendinga er áhugavert að fylgjast með þróun þessa máls því ef olía finnst á annað borð á íslenska Drekasvæðinu er líklegt að samskonar umræða geti komið upp á Íslandi. Fjarlægðin frá Drekasvæðinu til Langaness er nefnilega svipuð og frá olíusvæðinu í Barentshafi til nyrstu byggða Noregs.

Johan Castberg-svæðið samanstendur af tveimur olíulindum, Skrugård, sem fannst árið 2011, og Havis, sem fannst árið 2012. Áætlað er að lindirnar geymi 400-600 milljónir tunna af olíu. Statoil hafði áætlað að hafa fljótandi vinnslupall á svæðinu og dæla olíunni þaðan um 280 kílómetra langa leiðslu sem lægi á hafsbotninum til lands í Norður-Noregi. Byggja átti sérstaka olíuhöfn við Veidnes utan við bæinn Honningsvåg og átti hún að vera tilbúin árið 2018. 



Sveitarstjórnarmenn undir forystu oddvitans í Nordkapp, Færeyingsins Kristinu Hansen, glöddust yfir staðarvalinu í fyrra. Þeir sáu fram á 500-600 störf á byggingartíma og 40-60 ný föst störf í sveitarfélaginu við olíuhöfnina.

Statoil hefur síðan borað fimm aðrar holur í kringum olíulindirnir í von um að finna meira en þær hafa ekki skilað tilætluðum árangri. Segist félagið nú ætla að skoða aðra lausn á vinnslu olíunnar; að staðsetja fljótandi vinnsluskip á svæðinu sem myndi dæla olíunni beint í olíuskip. Það þýddi að leiðsla til lands yrði óþörf. Statoil hefur þó ekki slegið af áform um Veidnes-höfn og neðansjávarleiðslu en tekur fram að óvissa ríki um stuðning hins opinbera við uppbyggingu slíkra innviða. 



Norsk stjórnvöld, þar á meðal Olíustofnun Noregs, ásamt hagsmunaaðilum í Norður-Noregi, þrýsta á Statoil að velja lausn með olíuhöfn og leiðslu til lands. Félagið hefur hins vegar notað málið til að þrýsta á nýju hægri stjórnina að endurskoða skattabreytingar fyrri ríkisstjórnar, sem dró úr skattendurgreiðslum olíufélaga vegna fjárfestinga af þessu tagi.