Fagnar því að hreyfing komist á málið

„Ég óska engum þess að vera í slæmri stöðu,“ segir Stefán Karl Kristjánsson, lögmaður Tonys Omos en tilkynnt var í kvöld að aðstoðarmaður innanríkisráðherra, Gísli Freyr Valdórsson, yrði ákærður vegna meðferðar persónuupplýsinga nýgeríska hælisleitandans.

Gísli Freyr sendi frá sér yfirlýsingu í kvöld vegna málsins þar sem hann sagðist fullviss um að verða sýknaður en hann er sakaður um að hafa lekið minnisblaði um Tony Omos úr innanríkisráðuneytinu í fjölmiðla í nóvember í fyrra.

Stefán Karl kærði Hönnu Birnu Kristjánsdóttur og starfsmenn innanríkisráðuneytisins til lögreglu í upphafi þessa árs. Hann telur að Tony hafi verið beittur ranglæti stjórnvalds við úrlausn eða meðferð málsins,auk þess sem  hann telur Tony hafa orðið fyrir ærumeiðingum og aðdróttunum af hálfu innanríkisráðuneytisins. Meint brot kunna að varða við sjö ákvæði hegningarlaga.

Lögmaðurinn segir það svo sem ekkert fagnaðarefni í sjálfu sér að embættismaður sé ákærður. Mestu máli skiptir að nú komist loks hreyfing á hlutina. „Þetta þýðir að mál Tony Omos gegn Útlendingastofnun kemst aftur á rekspöl en fyrirtöku var frestað í apríl meðan beðið var eftir ákvörðun ríkissaksóknara í lekamálinu,“ segir Stefán Karl og bætir við hann eigi þó eftir að sjá ákæruna á hendur Gísla.

„Ég geri það örugglega um leið og aðrir ef hún verður þá birt enda engin sérstök ástæða til að birta mér hana,“ segir hann.