„Bendir ekkert til þess að stórt gos sé í gangi“

Jarðeðlisfræðingurinn Magnús Tumi Guðmundsson segir skort á skjálftaóróa benda til þess að ekki sé stórt gos í gangi á þeim stað þar sem vísindamenn urðu varir við sigkatla suðsuðaustur af Dyngjujökli í dag. Fylgst verði með mælum á Veðurstofunni í alla nótt og vísindamenn muni svo fara í flug í fyrramálið, um leið og birti, til að meta aðstæður að nýju.

Magnús Tumi fundaði með sérfræðingum Veðurstofunnar og Jarðvísindastofnunar Háskóla Íslands frá klukkan 22 til miðnættis. Magnús Tumi var á leiðinni heim af fundinum þegar Vísir náði af honum tali.

Líkt og greint hefur verið frá á Vísi í kvöld er sigdældin talin vera um 4-6 kílómetra löng og um 10-15 metra djúp. Magnús Tumi Guðmundsson jarðeðlisfræðingur segir í samtali við Vísi að dældin sé líkast til um kílómetri að breidd. Í raun sé um að ræða röð af samtengdum dældum eða miðjum yfir þessa 4-6 kílómetra.

„Ljóst er að umtalsvert magn af ís hefur bráðnað, eða er að bráðna, á jöklinum og því talin hætta á jökulhlaupi. Ekki er hægt að segja með vissu hversu stór flóðið verður né hvort það mun renna niður Skeiðarársand eða falla í Jökulsá á Fjöllum,“ segir í tilkynningu frá Almannavörnum sem send var út í kvöld.

Magnús Tumi ætlaði að gera sitt besta til að ná góðum nætursvefni fyrir morgundaginn. Jarðeðlisfræðingurinn heldur ásamt öðrum sérfræðingum í flug með TF-SIF til Vatnajökuls klukkan níu í fyrramálið.

Ekkert bendir til þess að stórt gos sé í gangi

Magnús viðurkenndi í samtali við miðnæturfréttir RÚV að töluverð óvissa væri uppi. Aðstæður í fluginu í dag hafi ekki verið hvað bestar en engu að síður hefðu þeir greint sprungur norðan við Gjálp þar sem gos varð 1996. Sigdæld hafi sést um 4-5 kílómetrar á lengd og um kílómetri að breidd. Á henni hefðu þeir orðið varir við fjórar miðjur, 10-20 metra djúpar, en ekki væri hægt að útiloka að þær væru fleiri vegna lélegra birtuskilyrða.

Magnús Tumi benti á að mjög stórum atburðum fylgdi mikill órói. Það væri ekki tilfellið sem stendur. Mögulegt sé að lítið gos hafi orðið þarna fyrir nokkrum dögum sem sé nú fyrst að koma fram. Þótt ekki hafi orðið vart við vatn undan jökli gæti það hafa runnið í Grímsvötn. Þar séu merki um að yfirborð hafi hækkað en það þurfi þó ekki að vera af völdum goss.

„Ekkert bendir til þess að stórt gos í gangi. Það er alveg klárt,“ sagði Magnús Tumi en það kæmi betur í ljós á morgun. Ef miðjurnar verða tiltölulega óbreyttar á morgun sé líklega atburður að klárast. Séu þær enn stærri og dýpri þá verði málið skoðað betur.