Vísindamenn kallaðir frá Holuhrauni: „Mátum svæðið mjög hættulegt“

„Það er mikill órói á svæðinu og menn eru að sjá ummerki um nýjar sprungur,“ segir Víðir Reynisson, deildarstjóri almannavarnardeildar, í samtali við Vísi.

Vísindamenn og fjölmiðlamenn við gosstöðvarnar í Holuhrauni hafa verið kallaðir af svæðinu að skála í Drekagili. Þar mun mannskapurinn vera þar til að frekari upplýsingar berast.

„Við vildum ekki taka neina sénsa og höfum því sent sms á alla þá sem eru að störfum við Holuhraun.“

Víðir segir að þörf sé frekari skýringu á auknum hristingi á svæðinu.

„Það eru um átta manns að vinna þarna ásamt fjölmiðlamönnum. Við einfaldlega mátum svæðið mjög hættulegt.“