Segir upplýsingar um Omos hafa verið skoðaðar um miðja nótt

Gísli Freyr Valdórsson, sem ákærður hefur verið í lekamálinu, segir að samantekt sú er upplýsingarnar byggði á hafi verið skoðuð á innra drifi innanríkisráðuneytisins aðfararnótt 20. nóvember síðastliðinn. Það er nóttin áður en fréttir af hælisleitandanum Tony Omos birtust í fjölmiðlum. Um 80 starfsmenn innanríkisráðuneytisins hafi haft aðgang að drifinu.

Þetta segir í greinargerð sem verjandi Gísla Freys lagði fyrir dómara við þingfestingu ákærunnar í morgun. Gísli Freyr segir í greinargerðinni að ekki liggi fyrir að nokkur starfsmaður innanríkisráðuneytisins hafi þá verið mættur til vinnu. Skjalið virðist því hafa verið kallað fram og skoðað utan úr bæ. Gísli Freyr sé ekki með svokallað VPN tengingu og kemst ekki inn á drifið nema innan ráðuneytisins. „Ákærða og verjanda var fyrst kunnugt um þetta atriði þegar þeir fengu gögn málsins afhent eftir útgáfu kæru,‟ segir í greinargerðinni.

Gísli Freyr krefst frávísunar málsins frá dómi. Meðal annars vegna óskýrleika ákærunnar en einnig á þeirri forsendu að lögregla hafi ekki gætt meðalhófs við rannsókn málsins. Þessu til stuðnings segir hann að rannsakendur hafi aflað upplýsinga um símnotkun sína tveimur mánuðum áður en hann tók við starfi aðstoðarmanns innanríkisráðherra, þá hafi rannsakendur gert kröfu um að fá aðgang að persónulegu pósthólfi hans og gert kröfu um að fá utan-á-liggjandi harðan disk í eigu ákærða sem m.a. innheldur fjölskyldumyndir, heimilisbókhald og aðrar persónulegar upplýsingar.