Eddu Björgvins þarf nú varla að kynna til leiks en þessi ástsæla gamanleikkona hefur glatt þjóðina undanfarna áratugi. Hún slær hvergi slöku við í þeim efnum en hefur undanfarin ár einbeitt sér að því að kynna mikilvægi húmors og gleði í hinu daglega lífi með því að halda námskeið og fyrirlestra í fyrirtækjum og skólum.
„Ég er búin að vinna með húmor og gleði í leiklistinni en þegar ég fór í stjórnendanám í Háskólanum á Bifröst ákvað ég að nýta þetta efni í meistararitgerðina mína, þar sem ég skrifað um húmor sem stjórntæki. Ég hef haldið námskeið í skólum og fyrirtækjum um allt mögulegt en eftir námið fór ég að einbeita mér að húmor sem stjórntæki og hvaða áhrif húmor getur haft sé hann hafður að leiðarljósi í stjórnun," segir Edda.
Já ekki er vanþörf á og ekki síst vegna þess að aukin gleði hefur merkjanleg áhrif.
„Það er svo geggjað að rannsónir sýna að þar sem verið er að vinna með húmor, gleði og hamingju á vinnustað er hægt að fá miklu meira út úr fólki. Starfsfólkið til dæmis losnar við streitu og það vinnur betur saman. Starfsfólkið verður jafnframt umburðarlyndara, fær fleiri hugmyndir og ekki sýst þá fækkar veikindadögum," segir Edda.
Miðað við mikilvægi húmors í hinu daglega lífi segist Edda ekki skilja hvers vegna ekki allir stjórnendur fyrirtækja séu með húmor, gleði og góðan starfsanda á stefnuskrá sinni.
„Þú færð 80% meira út úr starfsmanninum þínum sé hann glaður," segir hún.
Edda fer sem fyrr segir í fyrirtæki og leiðbeinir um hvað megi betur fara í þessum efnum. Og hún segir það vera fyrirtæki af öllum toga.
"Ég get hjálpað öllum að gera þetta á sínum forsendum. Það er nefnilega ekki til nein ein formúla, það væri auðvitað auðveldast að senda Ladda bara inn á alla vinnustaði landsins og þá væru allir glaðir, en það er því miður ekki hægt. Innan hvers vinnustaðar eru nefnilega svo ólíkir einstaklingar, sumir vilja ekki fíflalæti á meðan aðrir eru skíplar," segir Edda.
Stjórnendur geta vissulega haft sitt að segja um starfsandann á vinnustað, en sjálf getum við líka gert gagn í þessum efnum á hverjum degi.
„Við getum til dæmis passað neikvæðu orkuna á vinnustaðnum með því að stjórna umræðuefninu á kaffistofunni. Okkur er tamt að tala um allt sem okkur finnst svo stórkostlega ömurlegt. Reynum í staðinn að sækja sögur í gleðibankanna okkar, söfnum sögum af litlu börnunum í fjölskyldunni og af klaufalegum atvikum sem við lendum sjálf í. Innan skamms eru jafnvel örgustu fýlupúkar farnir að deila sínum sögum líka, segir gleðigjafinn Edda Björgvins.
