Ytri Rangá komin í 3000 laxa

Ytri Rangá er fyrsta og verður eina laxveiðiáin á þessu ári sem fer yfir 3000 laxa en veiðin hefur verið prýðileg í ánni síðustu daga.

Jóhannes Hinriksson veiðivörður gaf okkur þá skýrslu núna í hádeginu að lax númer 3000 hafi komið á land í Tjarnarbreiðu.  Þessi veiðistaður hefur verið að gefa feyknavel núna í október og er líklega óhætt að segja að yfir helmingur af aflanum sé að veiðast þar.  Inn á milli legna fiska sjást tiltölulega bjartir laxar sem eru nýlega gengnir svo það er óhætt að segja að það hafi verið gaman við bakka Ytri Rangár.  Það sem vekur líka athygli er að mikið af laxi sleppur eins og gjarnan en þeir eru líka að taka fluguna samhliða maðki og spún en þegar laxinn tekur flugu þegar saman fara köld á og kaldur lofthiti verða tökurnar oft mjög nettar.  Ennþá er vika eftir af veiðitímanum svo þessi tala á ennþá eftir að hækka eitthvað og miðað við ganginn í veiðinni liðna viku er ekki óvarlegt að skjóta á að 100-150 laxar bætist við þetta.