Orðið sjálfsagt að verðlauna börn með sælgæti

Margir eru með betra og hollara matarræði að markmiði í Meistaramánuði. Þar vegur eflaust þungt hjá mörgum ákvörðunin um að sleppa öllu sælgæti og gosdrykkjum. Sjónvarpskonan Friðrika Hjördís Geirsdóttir, Rikka, tók góða upphitun fyrir Meistaramánuð með framtaki sínu Sykurlaus september.

„Sykurlaus september byrjaði þannig að mér fannst fólk í kringum mig vera mikið að raða í sig mat án þess að hugsa mikið útí hvað það væri að setja ofaní sig. Mig langaði sjálfri að reyna það á eigin skinni hvaða áhrif sykurleysi myndi hafa á mig. Að auki fannst mér vanta umræðu í samfélagið um hvað það er mikill sykur í öllum matvælum sem okkur standa til boða,“ segir Rikka

 Viðtökurnar við sykurlausum september hafa verið framar björtustu vonum.

„Mér datt aldrei í hug að ég myndi fá svona mikil viðbrögð við þessu,“ segir Rikka.

Hún ákvað að reyna að draga fjölskylduna með sér í átakið;

„Ég ræddi þetta við strákana mína, sem eru sex og sjö ára, og þeir tóku mjög vel í þetta. Mér fannst líka gaman þegar ég frétti að þeir hefðu dregið vini sína með sér í þetta í skólanum. Það er hinsvegar töluvert erfiðara að fá börn til að taka þátt í sykurlausum september, og það er kannski ekki síst vegna þess umhverfis sem við búum við. Það er orðið svo sjálfsagt að við verðlaunum börnin okkar með sælgæti,“ segir Rikka, sem ákvað að verðlauna syni sína með skemmtilegri uppákomu í lok hverrar sykurlausrar viku. Bíóferð og hellaferð var meðal þess sem fjölskyldan gerði saman.

Rikka segir tilganginn með sykurlausum september ekki endilega að losa sig við allan sykur fyrir fullt og allt, heldur hafi markmiðið frekar verið að vekja fólk til umhugsunar og skapa umræðu. Hún segir sykurlausan september hafa haft góð áhrif á sig.

„Mér finnst ég vera jafnari í orku og svo finnst mér ég hugsa skýrar. Mér finnst ég sjá mun á húðinni minni og á líkamanum,“segir Rikka.