Cosby afboðar sig eftir ásakanir um nauðganir

Búið er að afboða komu Bill Cosby, leikara og grínista, í sjónvarpsþáttinn Late Show með David Letterman á CBS. Talið er að það tengist ásökunum um kynferðislegt ofbeldi og nauðgunum.

Cosby átti að koma fram í þættinum á miðvikudag en afboðaði komu sína eftir að fjölmiðlar greindu frá því að þrettán konur hefðu sakað hann um nauðgun. Engar skýringar hafa þó fengist á afboðun hans, hvorki frá hans talsmönnum né sjónvarpsstöðinni CBS.

Barabara Bowman, ein þeirra sem sakað hefur Cosby um verknaðinn, birti pistil í Washington Post sem vakið hefur gríðarlega athygli. Segir hún þar að þegar hún var sautján ára hafi Cosby áunnið sér traust hennar og fengið hana til að líta á sig sem föðurímynd. Hann hafi ráðist á hana margoft og nauðgað henni ítrekað.

Uppistandarinn Hannibal Buress sagði áhorfendum á sýningu sinni í síðasta mánuði að Cosby væri nauðgari og að hann vonaðist til að fólk myndi að minnsta kosti sjá endursýningar af þáttum hans í öðru ljósi.