Redknapp: Ein af verstu ákvörðunum dómara sem ég hef séð

Jamie Redknapp, fyrrum leikmaður Liverpool og knattspyrnuspekingur Sky Sports, var langt frá því að vera ánægður með rauða spjaldið sem Lazar Markovic fékk í leik Liverpool og Basel í Meistaradeildinni í gær.

„Þetta er ein af verstu ákvörðunum dómara sem ég hef séð en það á samt ekkert að taka athyglina frá því hversu lélegt Liverpool-liðið var," sagði Jamie Redknapp.

Lazar Markovic fékk rauða spjaldið á 60. mínútu eftir að hollenski dómarinn Bjorn Kuipers taldi hann hafa slegið Behrang Safari í andlitið. Markovic horfði hinsvegar á Safari áður en hann sló til hans og það vó eflaust þungt. Snertingin var lítil sem enginn en Safari setti á svið fína leiksýningu og rauða spjaldið fór á loft.

„Liverpool-liðið var einfaldlega ekki nógu gott í kvöld. Þeir hefðu getað verið tveimur eða þremur mörkum undir í hálfleik og Basel var miklu betra lið. Þessi leikur var táknrænn fyrir tímabilið hjá Liverpool," sagði Jamie Redknapp en hann var hneykslaður á þessu rauða spjaldi hollenska dómarans.

„Leikurinn er kominn í miklar ógöngur ef að þetta er rautt spjald. Ég hefði verið rekinn af velli í hverri viku ef að þetta er rautt spjald. Ef Markovic hefði aftur á móti gefið honum olnbogaskot í andlitið þá hefði þetta verið pottþétt rautt spjald," sagði Redknapp.

Það er hægt að sjá þetta umdeilda rauða spjald hér fyrir neðan.