Breytinga að vænta á Tinder

Notendur stefnumótaforritsins Tinder, sem er gríðarlega vinsælt hér á landi sem annars staðar, munu á næstunni geta borgað fyrir uppfærða útgáfu af forritinu sem mun bjóða upp á ýmsa nýja möguleika.

Á meðal þess sem hægt verður að gera í uppfærðu útgáfunni, sem talið er að muni kosta um 7 dollara á mánuði, er að leita að fólki sem statt er í annarri borg en maður sjálfur og að taka til baka „skip“ sem gefur til kynna að maður hafi ekki áhuga á viðkomandi.

Notendur hafa lengi kallað eftir því að hægt verði að taka „skip“ til baka þar sem fólk gerir það oft í óðagoti eða skiptir einfaldlega um skoðun og vill læka viðkomandi einhvern tímann seinna.

Sjá einnig: Tinder - Appið sem allir eru að tala um.

Þá hefur fyrirtækið gælt við þann möguleika, að minnsta kosti í Bretlandi, að setja takmörk á það hversu mörg „like“ hver notandi getur látið frá sér. Ef maður myndi hins vegar borga fyrir þjónustuna væru lækunum engin takmörk sett.

Ekki liggur fyrir hvenær uppfærða útgáfan kemur til almennra notenda forritsins en einhverjir notendur hafa fengið það til prófunar í Brasilíu, Bretlandi og Þýskalandi.