Allt lögreglunni að kenna

Thabo Sefolosha, leikmaður Atlanta Hawks, segir að lögreglan sé ábyrg fyrir því að hann spili ekki meira í vetur.

Sefolosha slasaðist illa í látunum þegar Chris Copeland, leikmaður Indiana, var stunginn á næturklúbbi á dögunum. Allt varð vitlaust og átök blossuðu upp þar sem bæði leikmenn Indiana og Atlanta tóku þátt í.

Lögreglan lét til sín taka í átökunum og Sefolosha kennir lögreglunni um að hann hafi meiðst það illa í átökunum að hann spili ekki meira á þessari leiktíð.

„Stöðu minnar vegna get ég ekki tjáð mig efnislega um málið. Ég er mjög þjáður og get sagt að þessi alvarlegu meiðsli mín eru lögreglunni að kenna," sagði Sefolosha.

Samkvæmt heimildum er til myndband af lögreglunni þar sem hún lemur Sefolosha með kylfum.