Dempsey með Tindastóli í kvöld

Bandaríkjamaðurinn Myron Dempsey verður með Tindastóli í leik liðsins gegn KR í Síkinu á Sauðárkróki í kvöld.

Dempsey meiddist á æfingu skömmu áður en úrslitarimman gegn KR hófst. Hann fékk heilahristing eftir að hafa fengið höfuðhögg.

KR leiðir í einvígi liðanna, 2-1, en Stólarnir unnu án Demspey hér á heimavelli á Sauðárkróki í síðustu viku.

Raunar hefur KR aldrei unnið Tindastól á Sauðárkróki en vinni liðið í kvöld verður það Íslandsmeistari. Með sigri tekst Tindastóli hins vegar að þvinga fram oddaleik sem færi fram í DHL-höllinni á laugardag.