Brynjar hefur ekki tapað á móti Stólunum í vetur

Brynjar Þór Björnsson, fyrirliði KR, verður í sviðsljósinu í kvöld þegar KR tekur á móti Tindastól í fyrsta leik liðanna í úrslitaeinvíginu um Íslandsmeistaratitilinn í Dominos-deild karla.

Leikur KR og Tindastóls hefst klukkan 19.15 í DHL-höllinni í Frostaskjóli og verður sýndur beint á Stöð 2 Sport.

KR og Tindastóll hafa mæst fjórum sinnum á tímabilinu, KR hefur unnið þrjá leiki og Stólarnir einn.

Brynjar Þór hefur þó ekki upplifað það ennþá í vetur að tapa fyrir Tindastólsliðinu því hann missti af tapleiknum á Króknum. KR-ingar töpuðu þá sínum fyrsta leik á tímabilinu en leikurinn fór fram 22. janúar.

Brynjar er því sá eini af lykilmönnum KR-liðsins sem hefur ekki upplifað það að tapa fyrir Tindastól í vetur. Magni Hafsteinsson tók hinsvegar fram skóna á ný í kjölfar tapsins á Króknum og er því í taplausa hópnum með Brynjari.

Brynjar hefur skorað 21,0 stig að meðaltali í þremur leikjum sínum við Stólanna í vetur þar af 23 stig eða meira í tveimur af þessum þremur leikjum.

Brynjar átti mikinn þátt í því að koma í veg fyrir sigur Stólanna í deildarleik liðanna í DHL-höllinni í október en hann skoraði þá 8 af 28 stigum sínum á síðustu tveimur mínútunum og í framlengingunni.

Brynjar hefur því skorað mun meira að meðaltali á móti Tindastól en hann er að skora að meðaltali í Dominos-deildinni sem eru 14,4 stig að meðaltali í leik.



Leikir Brynjars á móti Tindastól í vetur:

27. september - Úrslitaleikur Lengjubikarsins í Ásgarði

KR vann leikinn 83-75

23 stig, 2 stoðsendingar, 2 stolnir

23. október - Deildarleikur í DHL-höllinni

KR vann leikinn 95-89 eftir framlengingu

28 stig, 8 fráköst, 2 stoðsendingar, 2 stolnir boltar

2. febrúar - Undanúrslitaleikur í bikar í DHL-höllinni

KR vann leikinn 88-80

12 stig, 3 stoðsendingar, 4 stolnir