Ágúst Orrason ætlar að spila með Keflvíkingum í Dominos-deild karla í körfubolta á næstu leiktíð en þetta var tilkynnt á fésbókarsíðu Keflvíkinga í kvöld.
Keflvíkingar fá þarna aðra skyttu á stuttum tíma en Magnús Þór Gunnarsson snéri aftur heim í gær. Ágúst er 21 árs gamall og 191 sentímetra framherji. Nú er spurning um hvor þeirra fær tíuna.
„Nýr leikmaður bættist í hóp karlaliðs Keflavíkur í kvöld. Við bjóðum Ágúst Orrason hjartanlega velkominn í Keflavík! Nú getur þristunum rignt í TM-Höllinni...," segir á fésbók körfuknattleiksdeildar Keflavíkur.
Ágúst hefur spilað undanfarin þrjú tímabil með Njarðvíkingum en skiptir nú yfir í til erkifjendanna í Keflavík. Hann er hinsvegar uppalinn í Breiðabliki.
Ágúst var með 5,2 stig og 3,4 fráköst að meðaltali á 21,0 mínútu í úrslitakeppninni með Njarðvík en fékk mun minna að spila í síðustu fjórum leikjunum á móti KR en í fyrstu sex leikjum úrslitakeppninnar.
Ágúst skoraði einmitt mest í vetur á móti Keflavík en hann var með 13,0 stig að meðaltali í tveimur deildarleikjum Reykjanesbæjarliðanna.
Ágúst Orrason skiptir úr Njarðvík í Keflavík
Tengdar fréttir
Magnús aftur í Keflavík: Síðustu félagsskiptin á ferlinum
Magnús Þór Gunnarsson hefur ákveðið að koma aftur heim og spila með Keflavík í Dominos-deild karla í körfubolta á næstu leiktíð en þetta staðfesti hann við Vísi í kvöld.
Keflavík búið að ganga frá sínum þjálfaramálum
Körfuknattleiksdeild Keflavíkur tilkynnti um ráðningu á þjálfurum meistaraflokka félaganna í gær.
