Dóttir þess besta stal sviðsljósinu frá pabba sínum | Myndband

Leikmenn Houston Rockets náðu ekki mikið að trufla Stephen Curry í nótt en besti leikmaður tímabilsins í NBA-deildinni í körfubolta skoraði þá 34 stig þegar lið hans Golden State Warriors vann fyrsta leik liðanna í úrslitum Vesturdeildarinnar.

Það gekk hinsvegar mun betur hjá dótturinni Riley að trufla Stephen Curry á blaðamannafundinum eftir leikinn en þar var þessi næstum því þriggja ára stelpa algjör senuþjófur.

Riley sagði pabba sínum að vera stilltur, reyndi margoft að tala í hljóðnemann, skreið undir borðið, kíkti á blaðamenn undan borðinu, veifaði nánast öllum í salnum og sýndi hvað eftir annað að þar er skemmtilegur persónuleiki á ferðinni.

Auk þess að skora 34 stig í leiknum þá var Stephen Curry með 6 fráköst, 5 stoðsendingar og 2 stolna bolta. Hann hitti meðal annars úr 6 af 11 þriggja stiga skotum sínum.

Stephen Curry hefði eflaust látið eiginkonuna Ayesha Curry sjá um Riley rétt á meðan blaðamannafundinum stóð en mamman hefur væntanlega fengið sinn skammt af þessari fjörugu stelpu á meðan að Stephen Curry fór illa með varnarmenn Houston Rockets í leiknum.

Hér fyrir neðan má sjá samantekt af uppátækjum Riley Curry á blaðamannafundinum í nótt.