25 urriðar veiddust opnunardaginn í Laxárdal

Þrátt fyrir kulda og heldur mikla vetrartíð opnaði Laxárdalurinn í Laxá í Aðaldal í gær og veiðin var ágæt og urriðinn sérstaklega vel haldinn.

Þrátt fyrir þetta kalda vor og erfiða tíð kemur urriðinn vel undan vetri og algeng stærð af fiski sem veiddist í gær var um 3-5 pund samkvæmt Bjarna Höskuldssyni leiðsögumanni á svæðinu.  Áin er ennþá mjög köld eða um 5 gráður en langtímaspáin sýnir að það fer hægt hlýnandi á landinu svo kuldatíðinni fer vonandi að ljúka.  Laxárdalurinn nýtur mikilla vinsælda hjá erlendum veiðimönnum og Íslenskir veiðimenn eru farnir að stunda svæðið mikið líka enda þykir það mjög krefjandi og skemmtilegt.  Heilt yfir tala þeir sem þekkja svæðið vel að þú fáir kannski færri fiska, þó það eigi ekki alltaf við, en að meðalþyngdin sé hærri en á öðrum svæðum í Laxá.  Með lýnandi veðri förum við örugglega að fá meiri fréttir af silungasvæðunum í ánni en efra svæðið í ánni, nefnt Laxá í Mývatnssveit opnar eftir fáa daga.