Loksins er hægt að draga tölvupóstskeyti til baka

Netrisinn Google hefur bætt við möguleika sem eflaust margir verða ánægðir með. Nú er loksins hægt að afturkalla send skeyti.

Margir kannast eflaust við þá tilfinningu að hafa sent af stað tölvupóst og uppgötva sér svo til skelfingar að þú ert að senda skeyti á rangan aðila eða að hræðileg villa er í honum. Slíkt verður ekki vandamál lengur.

Möguleikinn hefur verið í prófun lengi hjá Google en var kynntur hjá fyrirtækinu á mánudag. Upphaflega var hann aðeins í boði á Google Inbox en eftir samtöl við notendur var ákveðið að möguleikinn yrði einnig í boði á vefútgáfu Gmail.

Hægt er að kveikja á þjónustunni með því að breyta stillingum í póstinum hjá sér. Þegar pósturinn er farinn af stað hefur notandinn fimm til þrjátíu sekúndur, eftir því hvaða stillingu hann velur, til að velja hvort hann vill draga póstinn til baka eður ei. Eftir að smellt hefur verið á senda birtist lítill gluggi sem spyr sendandann hvort hann hafi einhverja bakþanka um skeytið.