Grikkir þurfi að afsala sér fjárhagslegu fullveldi

Evrópskir leiðtogar fara fram á að Grikkir nánast afsali sér fjárhagslegu fullveldi sínu og ráðist í allsherjar niðurskurðaraðgerðir, gjörbreyti skatt- og lífeyriskerfi landsins og einkavæði ríkisfyrirtæki, vilji þeir halda áfram í evrusamstarfinu og forða sér frá gjaldþroti.

Þetta er á meðal þess sem fram kemur í tillögu Evrópusambandsins að samkomulagi við Grikki, eftir fund grískra stjórnvalda með fjármálaráðherrum ríkja ESB í dag. Á fundinum var Grikkjum gefinn þriggja sólarhringa frestur til að ganga að nýjum skilyrðum kröfuhafa til lausnar skuldavanda landsins. Grikkir þurfa að ganga í svo umfangsmiklar aðgerðir að þeim hefur verið líkt við pyntingaraðgerðir. 

Gríska ríkisstjórnin hefur lagt fram sínar tillögur sem eru að mörgu leyti svipaðar þeim og Grikkir höfnuðu í þjóðaratkvæðagreiðslu fyrir viku síðan. Talið er að fjögur lönd standi helst gegn því að tillögurnar verði samþykktar; Þýskaland, Slóvakía, Belgía og Finnland. Þýska blaðið Der Spiegel hvatti í dag Angelu Merkel, kanslara Þýskalands, til þess að koma í veg fyrir útgöngu Grikkja úr myndsamstarfinu. Mikilvægasta stund hennar í starfi kanslara sé runnin upp, en hún snúist um framtíð Evrópusambandsins.